ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានស្នើឱ្យឪពុកម្តាយ និងអាណាព្យាបាល នាំកូនទៅទស្សនាការតាំងពិព័រណ៍សៀវភៅដែលនឹងប្រារព្ធឡើងនៅថ្ងៃទី១០-១២ ខែមីនា ឆ្នាំ២០២៣នៅវិទ្យាស្ថានបច្ចេកវិទ្យាកម្ពុជា (តិចណូ) ចំថ្ងៃទិវាជាតិអំណាន ១១ មីនា លើកទី៨ ដើម្បីបណ្តុះស្មារតី និងជំរុញកូនឱ្យមានទម្លាប់អានសៀវភៅពីតូចទៅ។

លោក ហង់ជួន ណារ៉ុន បានថ្លែងនៅក្នុងសន្និសីទសារព័ត៌មានស្តីពីទិវាអំណាន ១១មីនា លើកទី៨ នៅរសៀលថ្ងៃទី០៦ ខែមីនា ឆ្នាំ២០២៣ ថា៖ «ខ្ញុំសូមអំពាវនាវដល់សាធារណជន នាំកូនចៅមកចូលរួមក្នុងពិព័រណ៍សៀវភៅនេះ ការបណ្តុះកូនពីតូចឱ្យចូលរួមពិព័រណ៍សៀវភៅ នាំកូនទៅបណ្ណាល័យនៅពីតូច ឬនៅជំទង់ក្តីនឹងធ្វើឱ្យកូនមានការចាប់អារម្មណ៍ និងលើកទឹកចិត្តដល់ការអានផងដែរ។ អានកាន់តែច្រើន ចេះកាន់តែច្រើន»។

បើតាមលោក ហង់ជួន ណារ៉ុន ក្នុងឱកាសក្រសួងអប់រំរៀបចំទិវាជាតិអំណាន ១១មីនា ក្រសួងអប់រំក៏នឹងរៀបចំការតាំងពិព័រណ៍សៀវភៅរយៈពេល ៣ថ្ងៃ គឺចាប់ពីថ្ងៃទី១០-១២ ខែមីនា នៅវិទ្យាស្ថានបច្ចេកវិទ្យាកម្ពុជាដែលមានស្តង់សៀវភៅចំនួន ១១០ស្តង់ មកពីស្ថាប័នចំនួន ៨៧។

លោកក៏បានណែនាំឱ្យឪពុកម្តាយ និងអាណាព្យាបាលត្រូវយកចិត្តទុកដាក់លើកូនចៅ ដោយមិនត្រូវបណ្តែតបណ្តោយឱ្យកូនលេងហ្គេមដែលធ្វើឱ្យកូនភ្លេចការរៀនសូត្រ ពោលត្រូវនាំកូនអានសៀវភៅដោយមានការផ្តល់រង្វាន់លើកទឹកចិត្តដល់កូន៕